يلا يا شعب
إفتحوا القلب الدهب
قلب الحقيقة الحلوه فى إبن البلد
مسلم مسيحى كلنا وبدون غضب
لازم نطهر أرضنا من كل أفعى بتتولد
ثورتنا نبضة حب بين العنصرين
رفعت رايتنا فوق وفرحت الولد
وأيد مسيحى ماسكه إيد مسلم أخوه
بفرحة نصر على فاسد نهب البلد
*********
للثورة أعداء النجاح
ميعرفوش نور النهار
ولا يقدروا أبداً يعيشوا بإرتياح
فى جو خالى من الغبار
ولا فى دنيا بدون دمار
ولما وعى الأمه عاد
وقبضوا على شر العباد
خاف الفساد
يجيله يوم ويتخنق
وبيض الأفاعى يتطحن تحت أقدام الولاد
فكر وفكر يعمل ايه !!!!
شاف المحبه أحلا حاجة بين ولادنا الطيبين
إسمى محمد وأخويا إسمه قديس أو إيميل
مسلم مسيحى يد واحدة من سنين
عايشين فى حضن بلدنا الدافى الجميل
على قلب واحد من دهب متجمعين
قلب العظيمه مصر أم العالمين
وخدانى من إيدى أنا وأخويا جميل
تتباهى فى العالم بحب العنصرين
ضحك الشيطان وقاله روح فرق تسد
يلا يا سيدى بقلب مارد أو أسد
إبعد محمد عن نبيل
تملك زمام كل البلد
أقتل نصارى ومسلمين
متخفش ابدا من العدد
أشعل نيران الفتنه بين العنصرين
يرجعلك المجد القديم ويعيش فسادك للأبد
سمع النصيحة من الشيطان
وراح يجرب فكرته
أشعل فى إمبابة النيران
وبدر بذور لفتنته
هدفه يكمل فى الفساد خطته
يخلق عداوة بين نصارى ومسلمين
ونعيش فى فتنه حيرنين
الجرح ده فى قلب مين ؟؟؟
قلبى وقلبك قلب واحد من سنين
لو جرح فى صدرك يقطعنى الانين
لو حزن فى قلبك تلاقينى حزين
أدعو إله الكون رب العالمين
يرد كيد المعتدين
وتعود بلدنا حصننا الدافى الأمين
بلد المسيح والمسلمين
ويروح زمان الفاسدين
ما يبقى غير المصلحين
هناك 4 تعليقات:
رائعة
بارك الله فيك يا شرشابي .. يا اعظم شاعر ورزقك العلم النافع وزين اخلاقك بالحلم واكرمك بالتقوي وجملك بالعافية وعافاك وعفي عنك ورزقك القناعة والرضا
بارك الله فيك يا شرشابي .. يا اعظم شاعر ورزقك العلم النافع وزين اخلاقك بالحلم واكرمك بالتقوي وجملك بالعافية وعافاك وعفي عنك ورزقك القناعة والرضا
جميلة جدا القصيدة وكمان معبرة عن الواقع بصور شفافة وأجمل ما فيها معانيها الجميلة من الوحدة بين المسلم والمسيحى ، بارك الله فيك ودائما فى نجاح.
إرسال تعليق