الأحد، 5 يونيو 2011

قصيدة ( وردة قلبى ) شعر / محمد كمال محمد الشرشابى

أهدى هذه القصيدة إلى إبنتى وحبيبتى ونور عينى  وكل قلبى            
غادة محمد كمال الشرشابى
بمناسبة قرب إنهاء دراستها وإقتراب موعد زواجها 
إنها ليست إبنتى فقط .. بل هى روحى وعقلى وحبيبتى ورغم صغر سنها لكن بحنانها أشعر أنها أمى ومعشوقتى لرقة معاملتها وصدق تعبيرها وحنانها 



قصيدة ( وردة قلبى )


يا بحر بلدنا يا غالى
بحب لقاك فى كل حالات
عشان حبى وأسراره فى أصدافك
وكان بينا كتير حكايات
كانت خطواتى تتهادى على رمالك
وبمشى معاك ساعات وساعات
وأحس إن الحبيب جنبى
بيزرع على الرمال بسمات
وأحس بلمسته الدافيه
 ونظرة عينه واللفتات
وصوت الضحكه فى ودانى
ودلال الحب والخطوات
وريحة عطرها الغالى
وشعر طويل سواد اليل فى الخصلات
ونور الدنيا فى جبينها
وورد أحمر على الوجنات
ورمش جميل طويل جارح
حفر فى القلب بيه كلمات
تعالج فى الفؤاد أوجاع
بدون مرهم ولا كريمات
وأمشى كتير وصوت موجك يكلمنى
وأحكيله .. ويسمعلى .. وأقوله على الحبيب حكايات
يفوقنى غياب الشمس عن شطك
وصوت الموجه والنسمات
ولاقى النور بيتلاشى
وأنا لوحدى بين الظلمات
ودقات قلبى تتزايد
وتنزل من العيون دمعات
أقول إشهد على حبى
وأسرار قلبى فى العمر الى عدى وفات
تقولى آه .. أنا شاهد ويشهد ما فى أحشائى
وكل الكون عليك شاهد على الآهه مع النبضات
ويجى اليل ويطلع فى السما قمره
ينورلى ظلام الوحده من تانى  .. ويبقى دليلى فى الطرقات
ويمسك ريشه من نوره ويرسم صوره على المية
صورة بنتى صورة قلبى .. ملاك جالى من الجنات
حقيقى هى دى عنيها
وده الرمش الى جارحنى
وده نور الجبين ساطع
على الميه مفرحنى
وألاقيها بتتحرك على الميه
ومشية بأجمل الخطوات
حبيبتى وبنتى وعنيا
يا غادة يا أجمل الجميلات
يارب يحفظك ليا
وأشوفك أسعد السعيدات