الجمعة، 13 مايو 2011

قصيدة (ثورة قلب) شعر / محمد كمال محمد الشرشابى



لسه بتقولى بحبك !!!
ما إنتى قلتيها زمان
كنت بسمعها بقلبى قبل ما تحس الودان
كنت أحس الحرف فيها ألف نبع من الحنان
إنتى فاكرة الحب كلمة بس ينطقها اللسان ؟؟
لا يا قلبى .. الحب همسه
يوم سمعها الصخر لان
****
بس إنتى خلاص بقيتى إنسانه مبترحميش
تخنقى حبى بإيدك
ولما أموت تقوليلى عيش
إنت إحساسى وقلبى مين غيرك خلاص مليش
****
ولما قلبى يقول سماح وأنسى وياكى الغياب
ألقيكى مرة تانيه قافله تانى ألف باب
أقول ياناس ده حب ولا ألف إسلوب للعذاب
إيه بيحصل !! إيه قولولى !! ِ ليه تملى أخبط فى باب
ولما أعضائى تثور وتتخبط بين الضاب
يبحثوا عن ثقب نور ولا ينبوع للشراب
يبحثوا عن حق ضايع ينبشوا عليه فى التراب
حق حبى حق قلبى إلى شايفه اليوم سراب
وإنتى قاعده تضحكى وتزرعى ورد فى خراب
وسيبه قلب كبير حنين يسكنه مليون غراب
وإنتى قافله ألف باب
****
بتلومينى وتقوليلى إنت ليه إتغيرت ليه
فين كلامك فين حنانك إلى متعود عليه
شوف زمان من كام سنه
كان كلامك ليا أشعار مش كلام
كنت تحلم بيا لما تروح تنام
كنا أيامها فى أحلى وأغلى لحظات إنسجام
إنت ليه إتغيرت ليه ؟؟؟
***
حطى نفسك يوم مكانى
تعرفى إتغيرت ليه
ياإلى كنتى فى يوم أمل عشت طول العمر فيه
لو بعدت كنتى قولى إنى غدار أو أنانى
لو يثور القلب شوفى يبقى مقدار حبك إيه
حطى  نفسك يوم مكانى
شوفى ثورة قلبى ليه ؟؟؟
يا حبيبتى .. الحب مش كلمة فى مقال !!!
الحب فعل مش كلام
يا حبيبتى .. الحب بيعيش بالوصال !!!
مش دقــايق يلا تخلص والسلام

******
تعرفى مصبرنى إيه ؟؟؟
إنى حبيتك زمان
لما كنت طفل برضع من عيونك الحنان
لما كان القلب فاضى مفيش لحد فيه مكان
إتزرع حبك ببذرة
نبتها من بدرى بان
والبذور صبحت جذور
ثابته متهزش سيقان
شوفتى ليه إنى بحبك حتى لو قافله الببان
عشان جذورى إتأصلت فى حب مليان بالحنان
لو ندهتيلى تلاقينى
فى لحظة جنبك فى الميدان
ولو ندهت عليكى إنتى
مش بلاقيلك ودان
بس ممكن يجى يوم وأنفجر منك وأضيع
يومها يمكن تبكى لفراق الطفل الرضيع
لو بقى فى قلبك مشاعر من مشاعرنا زمان
لو عرفتى حقيقة إنى حب غالى مش جبان
لو عرفتى الثورة ليه
كنتى مقفلتيش ببان

الخميس، 12 مايو 2011

قصيدة (فرحة جد) شعر / محمد كمال محمد الشرشابى



أهدى هذه القصيدة للمهندس /عبد المنعم    مشاركة منى فى فرحته بأول حفيد له من إبنه محمد عبد المنعم  ليحمل إسم العائله  والذى يمثل الحفيد الثامن له  والاول من إبنه الوحيد محمد حفظه الله لهم ورعاه .


قصيدة فرحة جد

فرحت كتيربأحفادى
لكن فرحى النهاره جديد
وحبى كبير لأولادى
ويوم عن يوم شعورى يزيد
بكل وليد  يهل العيد
يزيد الورد فى جنينتى حفيد بحفيد
وقاعد وسطهم قلبى تملى سعيد
لكن فرحى النهاره جديد
بفرع شديد  …  حفيد أبو زيد
******
يشيل إسمى ويبقى للأصاله وريث
ويكبر فى عيون جده
ويبقى عـندى أغلى جليس
*******
ويتعلم على إيدى ويزرع فى حياتنا ورود
هدية رب لمحمد وبحضورة بقى مسنود
يشيل إسمه وإسمى معاه ويذكرنا فى كل وجود
وأمه هند إنسانه مبتقصرش بالمجهود
يرضع حب من أمه ويبقى ودود
وأشوفه فى الحياه دايما شديد العود
أخده الفجر فى إديا نصلى ركعتين ونعود
ونتمشى أنا وهو نعدى حدود
وأحكيله ويفتح قلبه ويقولى بحب خلود
وأقوله يا مازن إتــأنى ده لسه زمان
يقولى يا جدو الأصل الكريم محدود
يفرح قلبى بالكلمه
وأتمنى أشوفه فى الحياه مسعود
وأقوله يا مازن إطمن
الأصل الكريم دايماً بالأصل الكريم موعود
وأشكر ربى ع النعمة
خلاص إسمى بقى ممدود
على مولد حبيب غالى

أجمل طفل فى الدنيا وأحلا حفيد
خلى الدنيا فى عنيا
تعدى عليا عيد ورا عيد
وأدعيله وأدعى لأمه ويا أبوه بعمر مديد
ويحفظهم ويحفظ إبنهم مازن حفيد أبوزيد

الاثنين، 9 مايو 2011

قصيدة (القلب الذهب) شعر / محمد كمال محمد الشرشابى

يلا يا شعب
إفتحوا القلب الدهب
قلب الحقيقة الحلوه فى إبن البلد
مسلم مسيحى كلنا وبدون غضب
لازم نطهر أرضنا من كل أفعى بتتولد
ثورتنا نبضة حب بين العنصرين
رفعت رايتنا فوق وفرحت الولد
وأيد مسيحى ماسكه إيد مسلم أخوه
بفرحة نصر على فاسد نهب البلد

*********
للثورة أعداء النجاح
ميعرفوش نور النهار
ولا يقدروا أبداً يعيشوا بإرتياح
 فى جو خالى من الغبار
ولا فى دنيا بدون دمار
ولما وعى الأمه عاد
وقبضوا على شر العباد
خاف الفساد
يجيله يوم ويتخنق
وبيض الأفاعى يتطحن تحت أقدام الولاد
فكر وفكر يعمل ايه !!!!
شاف المحبه أحلا حاجة بين ولادنا الطيبين
إسمى محمد وأخويا إسمه قديس أو إيميل
مسلم مسيحى يد واحدة من سنين
عايشين فى حضن بلدنا الدافى الجميل
على قلب واحد من دهب متجمعين
قلب العظيمه مصر أم العالمين
وخدانى من إيدى أنا وأخويا جميل
تتباهى فى العالم بحب العنصرين

ضحك الشيطان وقاله روح فرق تسد
يلا يا سيدى بقلب مارد أو أسد
إبعد محمد عن نبيل
تملك زمام كل البلد
أقتل نصارى ومسلمين
متخفش ابدا من العدد
أشعل نيران الفتنه بين العنصرين
يرجعلك المجد القديم  ويعيش فسادك للأبد

سمع النصيحة من الشيطان
وراح يجرب فكرته
أشعل فى إمبابة النيران
وبدر بذور لفتنته
هدفه يكمل فى الفساد خطته

يخلق عداوة بين نصارى ومسلمين
ونعيش فى فتنه حيرنين
الجرح ده فى قلب مين ؟؟؟
قلبى وقلبك قلب واحد من سنين
لو جرح فى صدرك يقطعنى الانين
لو حزن فى قلبك  تلاقينى حزين

أدعو إله الكون رب العالمين
يرد كيد المعتدين
وتعود بلدنا حصننا الدافى الأمين
بلد المسيح والمسلمين
ويروح زمان الفاسدين
ما يبقى غير المصلحين